Ásmundur Einar Daðason, lengst til hægri á myndinni, sagðist í kvöld ekki lengur styðja ríkisstjórnina. mbl.is/Kristinn

Ásmundur Einar Daðason, þingmaður Vinstrihreyfingarinnar-græns framboðs, lýsti því yfir á Alþingi í kvöld, að hann styddi ekki lengur ríkisstjórn sem héldi áfram umsóknarferlinu vegna Evrópusambandsins.

„Niðurstaða mín er því sú, að ekki sé skynsamlegt að halda áfram þessu Evrópusambandsferli og ég styð ekki lengur ríkisstjórn sem heldur þessu ferli áfram af jafnmiklum þunga og raun ber vitni," sagði Ásmundur Einar í umræðum um vantraust á ríkisstjórnina.

Hann rifjaði upp, að hann hefði setið hjá í atkvæðagreiðslu um fjárlagafrumvarpið og lýst því yfir, að stuðningur sinn við ríkisstjórnina væri skilyrtur.  Snúa þyrfti af þeirri braut í Evrópumálum, sem ríkisstjórnin væri á og sem væri gróft brot gegn stefnu VG.

Þá sagði Ásmundur Einar að Icesave-samningarnir væru beintengdir við Evrópusambandsumsóknina. Hann vísaði til orða Atla Gíslasonar fyrr í umræðunni í dag, um að þetta væri fullveldisbarátta og því gæti hann ekki annað en stutt vantrauststillöguna.

„Þetta snýst um að vega og meta og velta því fyrir sér hvort nú sé komið yfir einhverja línu sem dregin hefur verið. Ég hef haft skilyrtan stuðning við þessa ríkisstjórn. Er betra að vera áfram innan stjórnarliðsins og styðja þessa ríkisstjórn eða er betra að stöðva þetta ferli og segja hingað og ekki lengra í þessu máli?" sagði Ásmundur Einar. Hann sagði, að Íslendingar ættu að forgangsraða upp á nýtt og leggja þessa aðildarumsókn til hliðar. 

Ragnheiður Elín Árnadóttir, þingmaður Sjálfstæðisflokksins, sem tók til máls á eftir Ásmundi Einari, sagði að síðasti ræðumaðurinn hefði stolið af sér orðinu og þetta væru mikil tíðindi að hann styddi ekki lengur ríkisstjórnina. Það sýndi, að vantrauststillagan, sem sjálfstæðismenn lögðu fram, væri rétt og tímabær.