Reisa sjóvarnagarða við byggðina á Eyrarbakka

„Framkvæmdin eykur öryggi byggðarinnar til muna. Þorpið hér hefur orðið fyrir þungum búsifjum vegna sjávarflóða en nú ætti sú hætta að verða úr sögunni.“

Þetta segir Siggeir Ingólfsson, íbúi á Eyrarbakka og yfirverkstjóri garðyrkjudeildar Árborgar, í Morgunblaðinu í dag. Ræktunarsamband Flóa og Skeiða var lægsbjóðandi í gerð 170 metra langs sjóvarnagarðs á Eyrarbakka en tilboð í framkvæmdina voru opnuð fyrir nokkrum dögum.

Reistur verður garður austast á Eyrarbakka, það er sunnan við Háeyrarvelli en verulegt tjón varð í húsum þar í sjávarflóðum snemma árs 1990. Síðan þá hafa varnargarðar verið reistir á Eyrarbakka og Stokkseyri og með framkvæmdum nú er stoppað í síðustu göt.