Sálin hátt á lofti

Húsfyllir var og gríðargóð stemning á útgáfutónleikum Bubba Morthens og Sólskugganna í Hofi á Akureyri í kvöld. Þar kynntu Bubbi og félagar plötuna Ég trúi á þig, sem nýlega kom út en á henni fetar hópurinn vegi sálartónlistarinnar.

Sólskuggana skipa gítarleikarinn Börkur Hrafn Birgisson, Daði bróðir hans sem leikur á hljómborð og raddar, Ingi Björn Ingason bassaleikari og Kristinn Snær Agnarsson trommari.

Með Sólskuggunum léku Jóel Pálsson á tenórsaxófón, Ari Bragi Kárason á trompet og Ragnar Árni Ágústson á baritonsaxófón. Með Bubba sungu Rósa Guðrún Sveinsdóttir og Kristjana Stefánsdóttir, en sú síðarnefnda söng allar raddir á plötunni. Þessi mikla söngdíva flutti líka í kvöld eitt magnað blúslag og fór á kostum. Bjarki Sigurðsson raddaði líka í lögunum og greip í gítarinn.

Þá er að geta þess að Gréta Morthens, dóttir Bubba, söng eitt lag með föður sínum. Var listamönnunum fagnað vel og innilega í lok tónleikanna, sem voru sendir beint út á Rás 2.