30 sekúndur að hámarki

Neytendastofa telur að verðleit neytenda við notkun verðskanna í verslunum skuli að hámarki taka 30 sekúndur. Takist það ekki þá megi líta svo á að varan sé óverðmerkt.

Þetta kemur fram í leiðbeiningum, sem Neytendastofa hefur sent verslunum um túlkun reglna um verðmerkingar og einingarverð við sölu á vörum. 

Samkvæmt reglunum var verslunum frá 1. júní 2011 leyft að upplýsa neytendur um verð vöru með verðskönnum þegar um er að ræða vörur sem er óverðmerkt og forpökkuð. Verslanir eiga alltaf að hafa skilti sem sýnir einingarverð á skýran og greinagóðan hátt.

Neytendastofa segir að fjöldi ábendinga og kvartana hafi borist um að neytendur finni ekki verð vöru þar sem framangreind aðferð sé notuð í verslunum. Af þeirri ástæðu hafi Neytendastofa sent verslunum bréf þar sem þessi hlutlæga regla er kynnt.

• Blogga um frétt