Frekari lækkun fjárveitinga til Heilbrigðisstofnunarinnar á Sauðárkróki (HS) mun veikja samfélagið í Skagafirði enn frekar til lengri tíma litið.
Draga mun úr fýsileika fjárfestinga í atvinnulífi á svæðinu, draga mun úr þjónustu og búsetuskilyrði versna.
Þetta eru helstu niðurstöður Capacent sem unnið hefur skýrslu fyrir sveitarfélagið Skagafjörð um samfélagsleg og afleidd áhrif 8,4% niðurskurðar á fjárveitingum til HS á næsta ári. Fjárveitingar aftur til ársins 2008 eru skoðaðar en þær hafa á þeim tíma dregist saman um 34,1%. Á sama tíma hefur opinberum störfum á svæðinu fækkað um ríflega 30.
Í umfjöllun um mál þetta í Morgunblaðinu í dag segir formaður byggðaráðs Skagafjarðar, Stefán Vagn Stefánsson, skýrslu Capacent styðja það sem sveitarfélagið hafi áður haldið fram um áhrif niðurskurðarins.