Ólafur Ragnar Grímsson, forseti Íslands, hefur ekki enn gert upp hug sinn varðandi það hvort hann bjóði sig fram að nýju á næsta ári. Hann segir að um mitt ár hafi stefnt í að hann myndi draga sig í hlé eftir sextán ár í embætti en síðan þá hafi margir komið að máli við hann og hann verði að hlusta á fólkið.
Ólafur Ragnar var gestur í spjallþætti Sölva Tryggvasonar, Málinu, á Skjá einum í kvöld. Undir lok þáttar barst talið að næsta ári þegar fram fara forsetakosningar. Ólafur Ragnar minntist á að hann hefði ásamt eiginkonu sinni, Dorrit Moussaieff, keypt sér hús og það hefðu þau varla gert nema fyrir þær sakir að hann hygðist láta sextán ár í embætti forseta Íslands duga.
Spurður hvort hann hafi verið búinn að taka ákvörðun sagði Ólafur Ragnar svo ekki vera, og eins og staðan sé í dag hafi hann ekki enn gert upp hug sinn. Hins vegar yrði ekki frá því litið að óvissa væri enn ríkjandi á Íslandi og ekki væri aðeins hægt að taka ákvörðun út frá eigin hagsmunum.