Veðurstofa Íslands varar við stormi suðvestantil á landinu annað kvöld en vindstyrkur mun fara yfir 20 m/s.
Samkvæmt upplýsingum frá Veðurstofunni mun lægð nálgast landið úr vestri aðra nótt, um eða eftir miðnætti. Hvassast verður við suðurströnd landsins og í Vestmannaeyjum en einnig má reikna með hvössum vindi á Faxaflóasvæðinu. Lægðinni mun svo fylgja talsverð snjókoma.
Á þriðjudag mun svo aftur taka að lægja en reiknað er með áframhaldandi ofankomu.
Vegfarendum er bent á að fylgjast með tilkynningum um veður á heimasíðu Veðurstofu Íslands.