Lán frá árinu 2007 lækki

Þingmenn Hreyfingarinnar hafa lagt fram þingsályktunartillögu á Alþingi um almenna niðurfærslu á verðtryggðum fasteignaveðlánum heimila og afnám verðtryggingar. Tillagan felur í sér lækkun á þeim skuldum sem til eru komnar vegna hækkunar vísitölu neysluverðs frá árslokum 2007 og eru umfram verðbólgumarkmið Seðlabanka Íslands.

Tillagan gerir ráð fyrir að skuldir umfram þessi skilgreindu markmið verði fluttar frá heimilunum í sérstakan afskriftasjóð fasteignaveðlána. Þá er einnig lögð til breyting á verðtryggingarákvæðum slíkra lána.

„Orðið hefur alger forsendubrestur fyrir öllum greiðslumöguleikum á fasteignaveðlánum heimila landsins, forsendubrestur sem ekki er ásættanlegt að heimilin beri ein og sér. Það er því brýnt að heimilunum sé skapaður ásættanlegur og réttlátur grunnur til að standa undir sér og að þessar miklu hækkanir verði leiðréttar, enda tilkomnar vegna forsendubrests sem heimilunum var stöðugt sagt á árunum fyrir hrun að gæti ekki orðið. Tillagan gengur út á að leiðrétta þennan forsendubrest án þess að það leiði til aukins kostnaðar fyrir ríkissjóð og Íbúðalánasjóð og hlífi einnig eignahlið efnahagsreikninga lífeyrissjóða og fjármálafyrirtækja við skelli,“ segir í fréttatilkynningu frá Hreyfingunni.

Verðbólgumarkmið Seðlabanka Íslands er 2,5%, en verðbólga hefur verið vel yfir þessu marki síðustu ár. Hún var t.d. yfir 12% á árunum 2008-2009. Samkvæmt tillögunni á  afskriftasjóður fasteignaveðlána að vera eign í efnahagsreikningum skuldaeigendanna. Þar myndar þessi hluti lánanna nýtt óverðtryggt lán sem ber árlega 3,5% vexti. Sjóður þessi verður greiddur niður með 25 jöfnum árlegum greiðslum, í fyrsta sinn einu ári eftir stofnun sjóðsins.

Lagt er til að í afskriftasjóð fasteignaveðlána færist allar áfallnar verðbætur á verðtryggðum fasteignaveðlánum heimilanna umfram 2,5% þak, að frádregnum þeim leiðréttingum sem þegar hafa farið fram. Eigendur afskriftasjóðsins (kröfuhafar) verða því innlánsstofnanir, aðrir eigendur HFF-bréfa (og annarra bréfa Íbúðalánasjóðs) sem ekki eru í eigu lífeyrissjóða sem og lífeyrissjóðirnir. Eign þeirra er í sömu hlutföllum og kröfur þeirra hljóða upp á og fá þeir kröfur sínar greiddar á 25 árum með jöfnum árlegum greiðslum (jafngreiðslulán). Miðað er við að höfuðstóll kröfunnar beri 3,5% vexti. Það þýðir að sjóðurinn þarf að standa undir 15,168 ma.kr. inngreiðslu árlega.

Tillagan gerir ráð fyrir að sjóðnum verði skapaðar tekjur til 25 ára til að standa undir útgjöldum sínum. Þessar tekjur eru fjórþættar:

1. Sérstakt vaxtaálag verði lagt á öll fasteignaveðlán. Nemur það í upphafi 0,25%, en lækkar árlega um 0,01% uns það verður 0,10% þegar tíu ár eru eftir af endurgreiðslutímabilinu og helst óbreytt eftir það.

2. Lagður verði árlegur tímabundinn eignarskattur á eignir innlánsstofnana og HFF-bréfaeign annarra en lífeyrissjóða.

3. Vaxtabætur (eltandi vaxtabætur) sem annars hefði verið ráðastafað í vaxtabætur til heimilanna ef ekki hefði komið til niðurfærsla á skuldunum verða notaðar í staðinn til niðurgreiðslu sjóðsins.

4. Afgangurinn af fjármögnun sjóðsins verður fengin með sérstökum tímabundnum eignarskatti á eignir lífeyrissjóða.

• 1 blogg um fréttina

Bloggað um fréttina

• Ómar Geirsson: Hreyfingin, já Hreyfingin.