„Þó að lóan sé komin og eigi að kveða burt snjóinn, þá er fulldjúpt í árinni tekið að segja að vorið sé komið. Það vantar svolítið upp á. En það eru að koma nokkrir dagar sem verða mjög góðir,“ segir Óli Þór Árnason, veðurfræðingur á Veðurstofu Íslands, en í dag er jafndægur á vori.
„Við finnum að þegar sólarinnar nýtur, þá kemur sólbráð og það er farið að vera bjart fram á kvöld. Þannig að það styttist í þetta,“ segir Óli Þór.
Í dag er fyrsti dagur einmánaðar, sem er sjötti mánuður ársins í gamla norræna tímatalinu og síðasti vetrarmánuðurinn. Hann hefst á þriðjudegi í 22. viku vetrar, á milli 20. og 26. mars. Dagurinn í dag er víðast kallaður yngismannadagur og er helgaður piltum eins og harpa er tileinkuð stúlkum og þorri og góa húsbændum og húsfrúm. Áttu stúlkur þá að fara fyrstar á fætur til að taka á móti einmánuði og gleðja piltana.
Óli Þór segir að næsta helgi; föstudagur, laugardagur og sunnudagur verði hlýir og góðir. „Sunnan og vestan verður smá bleyta með af og til. Líklega verður nánast þurrt á Norður- og Austurlandi, a.m.k. lengst af. Það skiptir máli í svona hlýindum að hafa vind, hann rekur í burtu kalda loftið sem er ofan í dölunum fyrir norðan og austan. Ef það næst að reka kalda loftið út, þá verður mun hlýrra þar en á höfuðborgarsvæðinu.“
Óli Þór segir spár benda til þess að á föstudaginn verði hlýjast á Norðvesturlandi, og að Norður- og Austurland muni líklega hafa vinninginn um helgina. „En við erum samt að tala um mjög gott veður um allt land, 7-10 stiga hita sunnan- og vestanlands og 8-12 stig víða fyrir norðan og austan. Ef við verðum sérlega heppin gæti hitinn stigið upp í 15 á Norður- og Austurlandi.“
Síðan er búist við því að suðvestanáttin láti á sér kræla á nýjan leik eftir helgi og að þá fari veður smám saman kólnandi.