Lítil hætta á flóðbylgjum hérlendis

Ragnar Stefánsson jarðskjálftafræðingur segir að það sé lítil hætta á flóðbylgjum í kjölfar jarðskjálfta hér á landi.

„Okkar skjálftar orsakast af láréttum hreyfingum, þar sem plöturnar ganga á misvíxl meðfram hvor annarri, en þar sem flóðbylgjurnar verða mestar, eins og í Kyrrahafinu, eru plötuhreyfingarnar lóðréttar,“ segir Ragnar í Morgunblaðinu í dag.

Það þýðir að sjávarbotninn sem er nær landi rís upp og sá sem er fjær fer niður. Vatnsmassinn lyftist þá upp líka og myndar bylgju.