Varðskipið Þór er enn við slökkvistörf vestur af Faxaflóa, vegna elds um borð í flutningaskipinu Fernanda. Þyrla Landhelgisgæslunnar, TF-GNA flaug á vettvang í dag til að aðstoða við að meta aðstæður og koma búnaði til björgunarmanna.

Sex slökkviliðsmenn frá Slökkviliði höfuðborgarsvæðisins eru um borð í Þór. 

Samkvæmt upplýsingum frá Landhelgisgæslunni er staðan svipuð og fyrr í dag. Enn er leitast við að draga úr hita í skrokki skipsins og sprautar varðskipið Þór á skipið eftir því sem aðstæður leyfa.

Aðgerðir miðast sem fyrr við að tryggja öryggi og draga úr hættu á mengun, en um 100 tonn af olíu eru um borð í flutningaskipinu. Aðgerðum verður haldið áfram og staðan endurmetin ef breyting verður á. 

Þór hefur nú unnið að björgun flutningaskipsins í þrjá sólarhringa en strax á fyrsta sólarhring voru aðgerðir þær umfangsmestu sem varðskipið hefur sinnt til þessa en það hefur legið við bryggju bróðurpart ársins.

Enn er eldur og mikill hiti í skrokki skipsins. Ljósmynd/Landhelgisgæslan

Varðskipið Þór sprautar á flutningaskipið Fernanda eftir því sem aðstæður leyfa. Ljósmynd/Landhelgisgæslan

Tengdar fréttir

Flutningaskipið Fernanda

Harmsaga Fernöndu á enda

• Niðurrifi Fernöndu miðar vel
• Hófust handa við að rífa Fernöndu
• Undirbúa Fernöndu fyrir niðurrif
• Fernanda komin á fast land

» Fleiri tengdar fréttir

• 1 blogg um fréttina

Bloggað um fréttina

• Guðjón Sigþór Jensson: Gríðarleg dýr björgun