Eyjamenn fjölmenntu á Básaskersbryggju síðdegis í gær þegar Herjólfur lagðist þar að bryggju. Margir mættu á bílum og þeyttu flautur af miklum móð.
Með þessu vildu Eyjamenn sýna að þolinmæði þeirra í garð verkfalls undirmanna á Herjólfi væri á þrotum.
Að sögn Eyjafrétta var stór hluti af bílaflota Eyjamanna á bryggjunni og varð mikill hávaði af flautinu. Kveikjan að mótmælunum var ákall Berglindar Sigmarsdóttur sem krefst þess að samgöngurnar komist í samt lag.