Lögreglunni á Suðurnesjum barst snemma morguns fyrr í mánuðinum tilkynning frá leikskóla í Reykjanesbæ þess efnis að tveir menn hefðu tjaldað í skógarlundi rétt við leikskólann og að þeir væru að skríða á lappir. Lögreglumenn voru snarir í snúningum og mættu fljótlega á vettvang.
Í ljós kom að þarna voru á ferðinni tveir erlendir bakpokaferðalangar. Þeir höfðu leitað skjóls í rjóðrinu, örþreyttir og hraktir vegna veðurs nóttina áður. Engar skemmdir eða óþrifnaður var eftir tjaldbúana og þeim góðlátlega bent á að nota viðurkennd tjaldstæði í framtíðinni, sérstaklega í þéttbýlinu.