„Þetta er bara ruddaskapur við okkur“

Sameining heilbrigðisstofnana Vestfjarða og Patreksfjarðar er gerð í óþökk heimafólks á svæðinu og algjörlega án samráðs, sem heilbrigðisráðherra hafði þó boðað. Þetta segir Ásthildur Sturludóttir, bæjarstjóri Vesturbyggðar.

Ríflega helmingur allra íbúa í Vesturbyggð og í Tálknafjarðarhreppi, alls 688 manns, skrifuðu í fyrra undir áskorun til Kristjáns Þórs Júlíussonar heilbrigðisráðherra um að falla frá því að sameina heilbrigðisstofnanir Patreksfjarðar og Ísafjarðar undir einn hatt.

Undirskriftirnar voru afhentar þann 9. desember og nokkrum dögum síðar boðaði heilbrigðisráðherra á Alþingi að sameiningum á landsbyggðinni yrði frestað fram á haust, til að skapa meira svigrúm til samráðs vegna málsins.

Ekkert bólar á samráði en sameining keyrð áfram

Síðan er liðið rúmlega hálft ár og enn hefur ekkert bólað á umræddu samráði, að sögn Ásthildar. Í dag gaf heilbrigðisráðherra hinsvegar út reglugerð um sameiningar heilbrigðisstofnana í þremur landshlutum, sem taka munu gildi 1. október.

„Þetta veldur mér miklum vonbrigðum. Ráðherra sagði við okkur að hann ætlaði að eiga gott samstarf og samráð við heimamenn, en hann hefur ekki látið af því verða og við erum mjög óhress með að ríkið ætli að gera þetta algjörlega í óþökk heimafólks,“ segir Ásthildur.

Í tilkynningu sem ráðuneytið sendi fjölmiðlum í dag segir að markmiðið með sameiningu stofnana sé að styrkja rekstrar- og stjórnunareiningar, auka öryggi íbúa með góðri heilbrigðisþjónustu og nýta fjármuni betur. Í aðdraganda sameininganna í haust muni verðandi forstjórar hafa samráð svið sveitarstjórnarmenn á viðkomandi svæðum.

Óboðleg framkoma

Sveitarstjórn Vesturbyggðar hefur hinsvegar enn ekkert heyrt um málið frá ráðuneytinu, þrátt fyrir ítrekaðar óskir óskir um samráð og varnaðarorð frá öllum sveitarfélögum og fjórðungssambandi Vestfjarða.

„Þetta er náttúrulega bara óboðleg framkoma. Þau virðast ekki hafa neinn áhuga á því að hlusta á óskir heimamanna, sem er með hreinum ólíkindum. Þetta er bara ruddaskapur gagnvart okkur.“

Ásthildur bendir á að í Vesturbyggð sé vaxandi samfélag þar sem fólksfjölgun hafi verið stöðug síðustu 5 ár og atvinnuuppbygging sé í full blússi. „Við ætlumst til þess að ríkið bjóði okkur upp á þá heilbrigðisþjónustu sem við eigum sannarlega rétt á, eins og allir aðrir í landinu.“

Sjá fyrri frétt mbl.is: Fleiri heilbrigðisstofnanir sameinaðar

• 3 blogg um fréttina

Bloggað um fréttina

• Jón Benediktsson: Sameining - í orði en varla á borði.
• Ómar Ragnarsson: Sérstaða Vesturbyggðar að engu höfð.
• Haraldur Haraldsson: Þetta er bara ruddaskapur:Mikið sammála því,endurskoðið þetta!!!!