Íslenska ölgerðin Einstök mætir nú sínum erfiðasta andstæðingi til þessa í undanúrslitum HM bjórkeppni bjórvefsins Perfect Pint.
Íslensku bjórarnir hafa hingað til sigrað áströlsku bruggsmiðjuna Little Creatures, Skotana í BrewDog og hina velsku Tiny Rebel. Enn er um breskan andstæðing að ræða, en næsta rimma verður við ölgerðina Magic Rock Brewing. Sú er sögð vera öflug á sínu sviði og hefur m.a. hlotið tilnefningar sem besta nýja ölgerð veraldar árið 2012.
Úrslitin ráðast í netkosningu, en allir geta kosið í henni. Að sögn talsmanns Einstakrar er fyrirtækið nokkuð undir í kosningunni og því ljóst að nokkurn fjölda atkvæða þarf til að leggja Bretana. Meirihluti framleiðslu Einstakrar fer á erlendan markað, en bjórar fyrirtækisins eru m.a. seldir til Bandaríkjanna, Englands og Norðurlandanna.
Frétt mbl.is: Íslensk ölgerð á HM bjórsins