Rýming er ekki hafin í Kelduhverfi en Sturla Sigtryggsson, ferðaþjónustubóndi í Keldunesi, segir að þau geri ráð fyrir að til þess geti komið síðar í dag. Bændur í Kelduhverfi smöluðu fé af Vestursandi, fyrir neðan hraunið í Kelduhverfi á miðvikudag en enn á eftir að sækja einhver hross þangað. Sturla á von á að þau verði sótt á eftir.
Að sögn Sturlu eru veiðimenn í Litluá og Skjálftavatni og ferðamenn í gistingu í Keldunesi. Hann segir að ferðamenn sem hafi ætlað að gista í Keldunesi í nótt hafi komið við hjá þeim áðan en þau höfðu verið í Ásbyrgi. Var þeim tjáð af yfirvöldum að þau yrðu að yfirgefa svæðið og ekki væri nóg að fara í Keldunesi heldur gert að fara til Akureyrar.
Sturla og kona hans, Bára Siguróladóttir voru bæði róleg yfir fréttum af eldgosi undir Dyngjujökli þegar blaðamaður mbl.is heyrði í þeim en íbúum í Kelduhverfi hafa töluvert langan tíma til að koma sér af svæðinu ef til hlaups í Jökulsá á Fjöllum kemur.
Kelduhverfi liggur inn af botni Öxarfjarðar á Norðausturlandi. Næst sjónum eru víðáttumikilir sandar (Vestursandur) sem eru nú að mestu grónir. Þetta eru óshólmar Jökulsár á Fjöllum, mýrlent land, víða kjarri vaxið, með sjávarlónum, stöðuvötnum og ám. Síðan tekur við gamalgróið hraun og er byggðin nú öll á þessum forna hraunjaðri, enda liggur þjóðvegurinn þar.
itlaá í Kelduhverfi er bergvatnsá, sem upprunalega átti sér eingöngu upptök í lindum sem heita Brunnar við bæinn Keldunes. Frá 1976 á hún sér einnig upptök í Skjálftavatni en það myndaðist við jarðsig í Kröflueldum. Vatnið úr Brunnum er óvenjuheitt og blandast kaldara vatni úr Skjálftavatni, þannig er meðalhiti vatnsins í ánni um 12°C.