Ólafur einnig hættur störfum?

Nútíminn, fréttavefur sem hóf göngu sína í dag, heldur því fram að Ólafur Stephensen, annar ritstjóra Fréttablaðsins, hafi hætt störfum, rétt eins og Mikael Torfason, aðalritstjóri 365 miðla. Í frétt Nútímans segir að ósætti hafi komið upp á milli ritstjóranna og Kristínar Þorsteinsdóttur, útgefanda 365 miðla.

Mbl.is hefur ekki tekist að hafa uppi á Ólafi í dag, þrátt fyrir ítrekaðar tilraunir. Ýmsar sögusagnir hafa verið á kreiki um örlög hans hjá 365 miðlum en á fréttavefnum Vísi segir: „Ekki liggur fyrir hvert hlutverk Ólafs Stephensen, ritstjóra fréttastofunnar, verður í kjölfar breytinganna.“

Viðskiptablaðið heldur því fram í frétt sinni að Ólafi hafi boðist að starfa áfram sem ritstjóri Fréttablaðsins. Samkvæmt því sem kemur fram á Nútímanum hefur Ólafur sagt upp störfum og því væntanlega ekki þegið boðið um að starfa áfram.

Þá segir í Nútímanum: „Heimildir Nútímans herma að ósætti hafi komið upp milli Mikaels og Ólafs annars vegar og Kristínar hins vegar í síðustu viku. Óvíst er hvort það hafði áhrif á framvindu mála í dag.“

Frétt mbl.is: Mikael Torfasyni sagt upp

Frétt mbl.is: Vildu auka hlut kvenna

• 2 blogg um fréttina

Bloggað um fréttina

• Jóhann Elíasson: EKKI EIN BÁRAN STÖK ÞARNA Í SKAFTAHLÍÐINNI.
• Páll Vilhjálmsson: Ólafur Steph: Kristín er handbendi Jóns Ásgeirs - DV innan …