Bjarnaborg rýmd vegna elds

Slökkvilið höfuðborgarsvæðisins rýmdi Bjarnaborg, fjölbýlishús á horni Hverfisgötu og Vitastígs, á áttunda tímanum eftir að tilkynnt var um eld og reyk í húsinu.

Samkvæmt upplýsingum frá slökkviliðinu reyndist eldurinn vera í ruslageymslu hússins og hefur hann verið slökktur. Unnið er að reyklosa en tilkynnt var um eldinn upp úr klukkan sjö í morgun.

Allt tiltækt lið slökkviliðsins var kallað út og eins var Rauði krossinn kallaður út líkt og alltaf er þegar um rýmingu er að ræða. Var fenginn strætisvagn á staðinn þar sem íbúar hússins biðu á meðan slökkviliðið var að störfum.

Ekki er vitað um eldsupptök né heldur hversu miklar skemmdir hafa verið af völdum reyks og elds. Enginn slasaðist í eldsvoðanum, að sögn varðstjóra í slökkviliðinu.

Bjarnaborg var fyrsta eiginlega fjölbýlishúsið hér landi, en það var reist 1902. Húsið byggði Bjarni Jónsson sem bar viðurnefnið snikkari og var húsið kennt við hann. 

Eldsvoði við Hverfisgötu