Það er í mörg horn að líta hjá Lárusi Ásgeirssyni, framkvæmdastjóra kjúklingadeildar fyrirtækisins Almarai í Sádi-Arabíu. Það er stærsta matvælafyrirtæki í Mið-Austurlöndum.
Fyrirtækið getur framleitt allt að 550 þúsund kjúklinga á dag og í kjúklingadeildinni starfa um 3.500 manns. Lárus hóf störf hjá fyrirtækinu fyrir rúmu ári, en áður starfaði hann hjá Marel, Sjóvá og Icelandic Group.
Almarai er einnig stórtækt í mjólkurframleiðslu og vinnslu á mjólkurafurðum. Það rekur fimmtán risabú með um 130 þúsund mjólkandi kýr og eru að lágmarki 7.500 kýr á hverju búi. Hey til að fóðra skepnurnar í eyðimörkinni er meðal annars flutt inn frá Argentínu og Bandaríkjunum, að því er fram kemur í viðtali við Lárus um umsvif þessi í Morgunblaðinu í dag.