Sérhæft fjallabjörgunarfólk frá björgunarsveitum á höfuðborgarsvæðinu var kallað út um klukkan 11:30 þegar tilkynning barst um slasað fólk í sprungu við Þríhnúkagíg í Bláfjöllum. Talið er að tvær manneskjur hafi fallið um 20-30 m. Þyrla Landhelgisgæslunnar var kölluð út og hefur hún nú, kl. 12.35, flutt einn slasaðan mann á Landspítalann í Fossvogi. Þá var þyrla frá Norðurflugi einnig kölluð út sem og sjúkrabílar frá Slökkviliði höfuðborgarsvæðisins, samkvæmt upplýsingum Landsbjargar.
Ljósmyndari mbl.is, Eggert Jóhannesson, er staddur á vettvangi. Hann segir fjölmarga björgunarsveitarmenn, lögreglumenn og sjúkraflutningamenn á svæðinu. Nokkur leið er frá Bláfjallavegi að vettvangi slyssins.
Þríhnjúkar eru ofan við Heiðmörk um 20 km suðaustur af höfuðborgarsvæðinu í átt að Bláfjöllum. Þeir eru innan Bláfjallafólksvangs og tilheyra lögsögu Kópavogs. Þangað er um 25 mínútna akstur frá Reykjavík.
Gígurinn er kvikuhólf eldstöðvar sem gaus fyrir 3-4 þúsund árum. Áformað er að leggja veg frá Skíðasvæðinu í Bláfjöllum um 2,5 km í átt að Þríhnjúkagíg þar sem ráðgert er að byggja aðkomubyggingu inn í hraunstafn um 300 metra frá gígnum. Þaðan liggi jarðgöng inn í gíghvelfinguna miðja.
Uppfært kl. 13.36:
Fyrstu upplýsingar gáfu til kynna að fólkið hefði fallið tugi metra í gíginn sjálfan en svo reyndist ekki vera heldur féll það í sprungu sem er á milli bílastæðisins og Þríhnúkagígs, 4-8 metra.