Samþykktar voru á Alþingi í gærkvöldi breytingar á lögum sem heimila nánum ættingjum látinna einstaklinga í svokölluðum Guðmundar- og Geirfinnsmálum að leggja fram beiðni um að málið verði endurupptekið fyrir dómi hvað þá varðar.
Ögmundur Jónasson, þingmaður Vinstrihreyfingarinnar - græns framboðs, var fyrsti flutningsmaður málsins en meðflutningsmenn voru allir fulltrúar í stjórnskipunar- og eftirlitsnefnd Alþingis. Hann sagði í samtali við mbl.is í gær þegar frumvarpið var afgreitt úr nefndinni að um markmiðið væri í raun að gæta jafnræðis en eins og lögin voru áður höfðu dómþolar sem enn voru á lífi slíka heimild.
„Þarna er á ferðinni mikið réttlætismál. Þetta er einstakt mál í íslenskri réttarsögu og við erum að ljúka því sem betur hefði verið gert fyrir allmörgum árum.“