Holuhraun er nú um 82,8 ferkílómetrar að stærð. Eins og sést á meðfylgjandi mynd þá myndi hraunið ná að þekja nánast allt höfuðborgarsvæðið.
Kristín Jónsdóttir, fagstjóri jarðskjálftavár, teiknaði myndina inn á kortið, sem var birt á facebooksíðu Veðurstofunnar.
Á facebooksíðu Jarðvísindastofnunar Háskóla Íslands kemur fram að í gær hafi menn á vegum vettvangsstjóra á Húsavík farið meðfram öllum norðurjaðri hraunsins. Að jafnaði var jaðrinum fylgt í 5-20 metra fjarlægð, en á stöku stað urðu þeir að færa sig fjær þar sem ekki var fært nær jaðrinum.