Mjög blint í éljahryðjum

Heldur herðir á vestan- og suðvestanáttinni í kvöld. Einkum á það við um suðvestanvert landið þar sem reiknað er með 15-20 m/s í kvöld og fram eftir nóttu. Skafrenningsfjúk og mjög blint verður á köflum á meðan éljahryðjurnar eru að ganga yfir, samkvæmt upplýsingum veðurfræðings Vegagerðarinnar. Sjá veðurvef mbl.is.

Hálka er á Sandskeiði en hálka og skafrenningur á Hellisheiði og í Þrengslum. Snjóþekja og skafrenningur er á Mosfellsheiði og þæfingsfærð og skafrenningur á Kjósarskarði. Hálka og snjóþekja er víðast hvar á Suðurlandi.

Það er hálka eða snjóþekja á Vesturlandi og Vestfjörðum, einnig éljagangur og sumstaðar skafrenningur.

Hálka, snjóþekja og hálkublettir eru á Norðurlandi og sumstaðar éljagangur.

Hálka er á flestum vegum á Austurlandi og hálka með suðausturströndinni.

• Blogga um frétt