Mikill hiti vestanmegin í Vaðlaheiðargöngum hefur gert starfsmönnum erfitt um vik. Því er í skoðun að setja upp nýtt loftræstikerfi til þess að minnka hita og raka og skapa betri vinnuaðstæður að því er fram kemur í frétt Vikudags. Samkvæmt Vikudegi er loftræstikerfi Norðfjarðarganga, sem þó eru svipuð Vaðlaheiðargöngum í lengd og þvermáli, helmingi öflugra.
Meðalhiti í göngunum undanfarna daga hefur verið í kringum 31 gráðu. Auka þarf loftmagn inni í göngunum og hefur loftræstisérfræðingur verið fenginn til þess að meta hvað þyrfti að gera með tilliti til núverandi aðstæðna. Skortur hefur verið á loftmagni hjá þeim sem vinna innst inni í göngunum.