Innlent | mbl | 2.7.2015 | 8:41 | Uppfært 9:44

Engum ætti að leiðast um helgina

Frá írskum dögum á Akranesi. mbl.is/Júlíus

Oft er talað um að fyrsta helgin í júlí sé mesta ferðahelgi sumarsins fyrir utan verslunarmannahelgina. Það er alls ekki ólíklegt að margir muni leggja í ferðalag á næstu dögum en um helgina fara fram fjölmargar bæjarhátíðir og viðburðir.

Spáð er góðu veðri um allt land á laugardaginn og gæti hiti farið upp í átján gráður á Suðurlandi. Jafnframt er góðu veðri spáð fyrir norðan en þar má gera ráð fyrir 15 til 16 gráða hita og nokkuð björtu veðri.

Bjartast verður þó á Vesturlandi og er þar spáð um 14 stiga hita. Jafnframt er spáð góðu veðri á Austurlandi en samkvæmt spá Veðurstofunnar verður þar 16 gráða hiti og nokkuð bjart veður á laugardaginn.

Blautt verður hins vegar á Austurlandi á sunnudaginn samkvæmt spám en þurrt og hlýtt annars staðar á landinu.

Iggy Pop mætir á Ásbrú

Nóg er að gerast á landsbyggðinni um helgina en einnig á höfuðborgarsvæðinu. Til að mynda er langur laugardagur á Laugavegi og fjölmargir viðburðir tengdir því í miðbænum. Jafnframt verður tónlistarhátíðin All Tomorrow Parties haldin við Ásbrú í Reykjanesbæ um helgina og hefst hátíðin í dag. Stærstu nöfnin sem koma fram á hátíðinni í ár eru Iggy Popp, Belle and Sebastian og Godspeed! You Black Emperor. Hægt er að nálgast miða hér

En fjörið er ekki aðeins á suðvesturhorninu.

Á Vopnafirði fer fram bæjarhátíðin Vopnaskak sem haldin er á hverju ári. Í ár verða endurvaktir viðburðir sem nutu gríðarlegra vinsælda á sínum tíma. Þar ber helst að nefna hagyrðingakvöld og Hofsball þar sem Buff leikur fyrir dansi. Upplýsingar um hátíðina má sjá hér.

Á Akureyri verður nóg að gerast en í gær hófst þar N1-mótið í knattspyrnu og stendur það fram á laugardag. Búist er við um 1.800 keppendum og 180 liðum til þátttöku. Auk keppenda af öllu landinu koma þrjú erlend lið til þátttöku á mótinu, eitt frá Svíþjóð og tvö frá Færeyjum.

Fjölskylduhátíðin Írskir dagar á Akranesi hefst á föstudaginn með fjölbreyttri skemmtun fyrir alla. M.a. verður boðið upp á íþróttir, útimarkað, strandlíf, dorgveiði, sandkastalakeppni og síðast en ekki síst keppnina um rauðhærðasta Íslendinginn. Upplýsingar um hátíðina má sjá hér.

Þjóðlög og Goslok

Í gær hófst Þjóðlagahátíðin á Siglufirði sem er alhliða tónlistarhátíð með rætur í þjóðlagaarfinum. Þjóðlagahátíðin stendur frá miðvikudegi til sunnudags og í ár er yfirskrift hennar Fagurt syngur svanurinn. Að þessu sinni verður ólíkum hópum boðið að koma að halda tónleika á þjóðlagahátíðinni sem menn eru ekki vanir að sjá á slíkum hátíðum. Lúðrasveit mun halda tónleika og ganga um götur Siglufjarðar meðan á hátíðinni stendur og lífga upp á bæjarlífið, von er á erlendum gestum sem munu setja sterkan svip á hátíðina, m.a. frá Finnlandi og Eistlandi svo einhver lönd séu nefnd. Hér má sjá umfjöllun Morgunblaðsins um hátíðina og heimasíðu hennar, folkmusik.is

Núna um helgina fer jafnframt fram hin margrómaða Goslokahátíð í Vestmannaeyjum en þá er endalokum eldgossins í Heimaey fagnað. Í ár eru 42 ár síðan gosinu lauk, 3. júlí 1973. Dagskrá hátíðarinnar er fjölbreytt og má þar nefna Sirkus Íslands sem verður með sýningar á malarvellinum, KK-Band sem kemur fram á balli í Höllinni ásamt Eyþóri Gunnarssyni og Bjartmari og bergrisunum, sjö tinda göngu frá Stórhöfða og göngumessu frá Landakirkju að gíg Eldfells og að Stafakirkju.

Dagskrána í heild má sjá hér.

Bjössi greifi tryllir lýðinn

Á bæjarhátíðinni Ólafsvíkurvöku á Ólafsvík sem fram fer um helgina hittast bæjarbúar á morgun í sínum hverfum og skreyta. Best skreyttu hverfin fá verðlaun.

Á föstudaginn hefst síðan fjölbreytt dagskrá sem inniheldur m.a. dorgveiðikeppni, tónleika með Sætabrauðsdrengjunum og bryggjuball með Bjössa greifa.

Dagskrána í heild má sjá hér.

Bátadagar á Breiðafirði hefjast á föstudaginn. Félag áhugamanna um Bátasafn Breiðafjarðar á Reykhólum (FÁBBR), í samvinnu við Báta- og hlunnindasýninguna á Reykhólum (BogH), stendur fyrir bátahátíð súðbyrtra trébáta á Breiðafirði í áttunda sinn. Eru eigendur trébáta hvattir til að mæta með báta sína.

Safnast verður saman á Reykhólum en lagt af stað í 6-8 klukkustunda siglingu um Breiðafjörðinn næsta morgun. Gert er ráð fyrir að leggja af stað um klukkan tíu frá Stað.

Upplýsingar um Bátadaga má sjá hér.