Verðlaunahrútar og tískusýning

Mærudagurinn fer fram á Húsavík í dag, en hann leysir af hina gamalkunnu Mærudaga (í fleirtölu) sem áður voru haldnir. Bæjarbúar tóku þó forskot á sæluna í gærkvöldi og stóðu fyrir ýmsum uppákomum, en t.a.m. fór fram hrútasýning Fjáreigendafélags Húsavíkur við höfnina, tískusýning frá Handverkshúsinu Kaðlín og karlakórssöngur auk þess sem boðið var upp á grillað lambakjöt.

Veitt voru verðlaun fyrir glæsilegasta hrútinn, en þau hreppti hrútur í eigu Friðriks Jónassonar. Yfirdómari í keppninni var útvarpskonan Guðrún Dís Emilsdóttir.

Ákveðið var að þjappa Mærudögum saman í einn dag í hagræðingarskyni, en áður náðu þeir yfir alla helgina. Var þetta m.a. gert til að nýta svið hátíðarinnar betur, en einnig hafði umtalsverð styrkskerðing frá Norðurþingi mikið að segja.

• Blogga um frétt