Frekar er búist við að dilkar verði lakari við slátrun í haust en undanfarin ár. Það er vegna erfiðs vors og kulda og rigninga í sumar og haust.
Of snemmt er þó að fullyrða um það, segir í umfjöllun um þetta mál í Morgunblaðinu í dag. Nú eru uppskerustörfin að hefjast í sauðfjárræktinni með göngum, réttum og sláturtíð.
Réttir hefjast um aðra helgi, 5. og 6. september, aðallega þó á Norðurlandi. Raunar eru allra fyrstu réttirnar á morgun, laugardag, þegar smalað er beitarhólf og réttað í Rugludalsrétt í Blöndudal, eins og sést á réttalistanum sem Bændasamtök Íslands hafa tekið saman og birtist í Bændablaðinu í gær.