Á „ljósbrettum“ við strendur Íslands

Á ferðabloggsíðunni Stuck in Iceland birtist nýlega myndband af mönnum á heldur óvenjulegum brimbrettum við strendur Íslands.

Í myndbandinu sjást brimbrettakempurnar Hodei Collazo, Imanol Yeregi og Natxo González sýna listir sínar á brimbrettum skreyttum allskonar ljósum. Þrátt fyrir mikinn kulda ákváðu þeir að ferðast til Íslands til að sjá fegurð landsins, sem kemur greinilega fram í myndbandinu.

Frétt mbl.is: Vefur þeirra sem elska Ísland

Í viðtali á Stuck in Iceland segjast þeir hafa sigrast á kuldanum, sem virtist að þeirra sögn ekki bíta á heimamenn, með því að kappklæða sig þann tíma sem þeir voru hér á ferli. Einum þeirra varð meira að segja svo kalt að hann tók upp á því að pissa á hendurnar til að halda á þeim hita.

Þeir segja öldurnar við Íslandsstrendur mjög góðar og að ef ekki væri fyrir kuldann væri landið örugglega fullt af brimbrettaköppum. Kvikmyndagerðarmaðurinn Igor Bellida Molina segist á Stuck in Iceland ætla að koma aftur til landsins fljótlega því landið sé það fallegasta sem hann hafi séð og bætir við að hann hafi ferðast mestalla ævi.

• Blogga um frétt