Handteknir í tjónabíl í íbúagötu

Lögreglan á Suðurnesjum handtók þrjá karlmenn sem voru í afar annarlegu ástandi í skemmdri bifreið í íbúagötu í Keflavík síðastliðið laugardagskvöld. Grunur leikur á ölvun við akstur og þá telur lögreglan ljóst, sé miðað við skemmdir á bifreiðinni, að hún hafi oltið. Óljóst er hvar það gerðist.

Lögreglan fót á vettvang um klukkan 22 og komu að bifreiðinni sem var lagt fyrir framan hús í götunni. Að sögn lögreglu barst tilkynning frá sjónarvotti sem sá bifreiðina á ferð í götunni.

Maðurinn sem lögreglan telur að hafi verið ökumaður bifreiðarinnar er grunaður um ölvun við akstur. Þetta er ekki í fyrsta sinn sem maðurinn brýtur af sér með þessum hætti. 

Þá leikur jafnframt grunur á að mennirnir - allir eða hluti þeirra - hafi verið undir áhrifum fíkniefna. 

Þeir voru handteknir á staðnum og færðir á lögreglustöð. Þar var tekin af þeim skýrsla og blóðprufur. Mönnunum var í framhaldinu sleppt. 

Aðalvarðstjóri segir í samtali við mbl.is að bifreiðin hafi verið töluvert skemmd og líklegt þyki að hún hafi oltið. Hins vegar sé ekki vitað hvar eða hvenær það gerðist. 

• Blogga um frétt