Fyrstu skipin eru byrjuð veiðar á íslenskri sumargotssíld og var reiknað með að Ásgrímur Halldórsson SF landaði rúmlega 200 tonnum á Höfn í Hornafirði í gærkvöldi.
Skipið hélt til veiða á föstudag og fékkst aflinn í Jökuldýpi út af Snæfellsnesi, en lítið hafði fundist undan Suðausturlandi á leiðinni austur í gær. Jóna Eðvalds SF og Vilhelm Þorsteinsson EA eru einnig byrjuð á íslensku síldinni og voru í gær á leiðinni á miðin í Kolluál og Jökuldýpi.
Fjögur skip voru í gær við veiðar á norsk-íslenskri síld út af Austfjörðum.