Brynhildur Pétursdóttur, þingkona Bjartrar framtíðar, gagnrýndi í þætti Sigurjóns M. Egilssonar, Sprengisandi, í morgun framlög til menningarmála á landsbyggðinni. Jafnvel þó að framlögin væru lögð saman kæmust þau til að mynda ekki nærri framlagi ríkisins til Hörpu, sem er 700 milljónir.
Sagði hún mikla vöntun á innkomu hins opinbera á fjármögnun menningarmála víða, ekki síst á Austurlandi þaðan sem dýrt sé að komast til höfuðborgarsvæðisins. Margir hafi hreinlega ekki efni á því að sækja sér menningu til höfuðborgarinnar.
Raunar sagði Brynhildur kerfið í heild þarfnast endurskoðunar þar sem það væri „hipsum haps“ hvort og hvernig hið opinbera komi að því að styrkja verkefni. Sum komist á fjárlög, önnur sæki sér styrki úr ýmsum sjóðum eða fái fé frá sveitarfélögum á meðan önnur fái ekkert.
Tekur sem dæmi, ef við tökum bara framlögin sem fara í Hörpu, þá myndu öll framlög sem fara til menningarmála á landsbyggðinni ekki ná heildinni.
Unnur Brá Konráðsdóttir, þingkona Sjálfstæðisflokks, sagði eðlilegt að athuga að fenginni reynslu hvernig standa eigi að þessum málum. Núverandi kerfi hafi verið við lýði í nokkur ár og hugsanlega tímabært að athuga hvernig það hefur reynst. „Við viljum hafa þannig kerfi að hægt sé að byrja á nýjum verkefnum,“ sagði Unnur Brá.
Þá væri mikilvægt að meta það eftir að reynsla kemst á rekstur verkefna hversu mikila aðstoð þau þurfi og hvort þau geti staðið á eigin fótum.
Þó núverandi kerfi sé ófullkomið eins og gerist sagði Unnur Brá það þó mikla framför frá fyrri tíð þegar fjöldi manns kom á fund alþingismanna og biðlaði um fjármagn.