Þau eru nokkuð snögg umskiptin og með kólnandi veðri um land allt eru líkur á éljum, en þó ekki suðaustanlands. Bleytan á vegyfirborði frýs og launhált verður því, sérstaklega sunnan- og vestantil, segir í athugasemd veðurfræðings Vegagerðarinnar.
Þæfingur er á Hellisheiði, Sandskeiði og í Þrengslum, eins er þæfingur á Mosfellsheiði, Lyngdalsheiði og á Laugarvatnsvegi. Hálka er á Reykjanesbraut og á höfuðborgarsvæðinu. Snjóþekja og hálka er á Suður- og Suðausturlandi.
Snjóþekja og hálka er á Vesturlandi.
Á Vestfjörðum er þungfært á Steingrímsfjarðarheiði, Þröskuldum og á Innstrandavegi. Þungfært og éljagangur er á Hálfdáni en snjóþekja og éljagangur á Mikladal.
Á Norðurlandi er hálka og snjóþekja en þungfært og stórhríð á Tjörnesi, Hálsum og Hófaskarði. Éljagangur eða snjókoma mjög víða.
Á Austurlandi er hálka eða hálkublettir.