Eldri maður lést í hörðum árekstri tveggja bifreiða á Suðurlandsvegi nærri Lögbergsbrekku við Gunnarshólma, skammt ofan við Reykjavík, síðdegis í gær.
Þrennt var í bílunum og var fólkið flutt á slysadeild, en í gærkvöldi fengust ekki nánari upplýsingar um líðan þeirra tveggja sem lifðu af.
Rannsóknarvinna lögreglu á vettvangi og annað starf tók um tvær klukkustundir eða fram til klukkan 18. Þá hafði lögregla snúið ökumönnum í austurátt við á Norðlingaholti í Reykjavík og eystra og var Þrengslavegi og Hellisheiðinni lokað við Hveragerði. Á þessum stöðum beið fjöldi fólks og langar biðraðir mynduðust.
Ekki liggur fyrir á þessari stundu hver tildrög slyssins voru. Alls hafa 13 látist í umferðinni það sem af er árinu, en voru fjórir í fyrra.