Skiptar skoðanir um hrelliklám

Kvenréttindafélags Íslands hefur gefið út skýrslu um hrelliklám. Þar  er farið yfir löggjafir sem ýmis lönd hafa sett gegn hrelliklámi og rýnt í viðhorf íslenskra ungmenna til hrellikláms.

Vigdís Fríða Þorvaldsdóttir vann skýrsluna sumarið 2015 og var starf hennar styrkt af Nýsköpunarsjóði námsmanna hjá Rannís. Þrátt fyrir ungan aldur hefur Vigdís Fríða lengi verið virk í jafnréttisbaráttunni, en á menntaskólaárum sínum stofnaði hún Femínistafélag Fjölbrautaskólans á Suðurlandi. Vigdís Fríða stundar nám í félagsfræði og kynjafræði við Háskóla Íslands, að því er segir á vefsíðu Kvennréttindafélags Íslands.

Hrelliklámsmálum fjölgað ört

„Hrelliklám á sér langa forsögu, en nýlega hefur hrelliklámsmálum fjölgað ört. Viðbrögð við dreifingu hrellikláms hafa verið skjót, sérstaklega síðustu tvö árin. Ýmis alþjóðleg tölvunarfyrirtæki og samskiptamiðlar hafa hafið sérstakar aðgerðir til þess að sporna gegn dreifingu hrellikláms og stofnanir og félagssamtök hér á landi eru byrjuð að safna upplýsingum um umfang og eðli hrelliklámsmála sem á þeirra borð berast,“ segir á síðunni.

Kynslóðarmunur á viðhorfum til nektarmynda

„Skiptar skoðanir eru um hrelliklám meðal ungu kynslóðarinnar. Þátttakendur í tveimur rýnihópum upplifðu mikinn kynslóðarmun á því hvort það sé í lagi að senda nektarmynd eða ekki. Einnig var algeng upplifun þátttakenda að strákar sendu fleiri nektarmyndir en stelpur, en ungar stelpur voru hins vegar sérlega oft nefndar sem líklegir brotaþolar hrellikláms.“

Í vefsíðunni segir einnig að geri þurfi ýmsar breytingar á frumvarpi til laga gegn hrelliklámi sem var lagt fram á Alþingi til að löggjöfin komi að gagni. 

Netfyrirtæki og samfélagsmiðlar setji reglur 

Þegar rýnt er í niðurstöðum skýrslunnar kemur fram að til að sporna við hrelliklámi sé nauðsynlegt að banna það með lögum en einnig þurfi einstök netfyrirtæki og samfélagsmiðlar að setja reglur um dreifingu hrellikláms. Ástæðan er sú að ríkisvaldið hefur oft lítið um það að segja hvað birtist á netinu og hvað ekki. Einnig er bent á að fagaðilar geti gert ýmislegt til að sporna við hrelliklámi, aðallega með fræðslu. 

Birtingarmynd á arfagömlu vandamáli 

Í niðurstöðunum segir einnig: „Hrelliklám er ekki nýtt vandamál, heldur er það ný birtingarmynd á arfagömlu vandamáli, undirskipun og klámi. Áhugavert verður að fylgjast með þeim breytingum sem verða á Íslandi á næstunni, en vísbendingar eru um að umfang vandamálsins sé mikið hér á landi. Nauðsynlegt er að efla rannsóknir á hrelliklámi hér á landi, og þar mætti meðal annars rannsaka langtímaáhrif á þolendur."

• Blogga um frétt