„Við erum ánægð með að þessu máli skuli vera lokið. Við tökum undir orð Hæstaréttar um að við hefðum getað merkt þetta betur,“ segir Smári Sigurðsson formaður Landsbjargar um dóm sem féll í gær í máli manns sem slasaðist þegar hluti skottertu skaust í andlit hans.
Frétt mbl.is: Landsbjörg ber helmingsábyrgð
Í dómi Hæstaréttar kom fram að allar leiðbeiningar á tertunni hefðu samrýmst þeim kröfum sem gerðar væru til leiðbeininga í reglugerð um skotelda að því undanskildu að ekki voru leiðbeiningar um að öryggisfjarlægð væri 25 metrar.
Þar sem leiðbeiningarnar hefðu ekki verið jafn ítarlegar og ákvæði reglugerðarinnar mæltu fyrir um var talið að ágalli hefði verið á tertunni og að á þeim ágalla bæri Slysavarnarfélagið Landsbjörg ábyrgð.
„Frá því að þetta slys varð þá höfum við bætt úr þessum ágalla og gert gangskör að því að endurskoða allar okkar vörur og laga allt sem var ábótavant,“ segir Smári í samtali við mbl.is.
„Síðan þá eru einnig komnar strangari reglugerðir en við höfum CE-vottað vörurnar okkar og í raun gengið lengra en lágmarkskröfur gera ráð fyrir.
Við lítum það alvarlegum augum þegar fólk slasast og tökum fullt tillit til þess sem segir í dómnum. Við erum ánægð með að málinu sé lokið með fastri niðurstöðu.“