Hæstiréttur Íslands hefur dæmt 32 ára karlmann í 30 daga fangelsi og svipt hann ökuréttindum ævilangt.
Hann hafði verið sektaður um 185 þúsund krónur og sviptur ökuréttindum í 18 mánuði í Héraðsdómi Reykjavíkur. Ríkissaksóknari áfrýjaði þeim dómi til hæstaréttar, sem kvað upp sinn dóm í dag.
Maðurinn var sakfelldur í héraði fyrir umferðar- og fíkniefnalagabrot með því að hafa ekið bifreið undir áhrifum bæði áfengis og fíkniefna og á sama tíma haft í vörslum sínum fíkniefni.
Í dómi hæstaréttar kom fram að hann hefði tvisvar áður hlotið refsingu sem skipti máli við ákvörðun refsingar hans. Fyrst var hann sektaður og sviptur ökuréttindum í 12 mánuði fyrir akstur undir áhrifum ávana- og fíkniefna og síðar var hann dæmdur í fimm mánaða skilorðsbundið fangelsi og sviptur ökuréttindum í þrjú ár fyrir ölvunarakstur og akstur undir áhrifum ávana- og fíkniefna auk fleiri brota.
Talið var að þótt hann hefði staðist skilorð þess dóms breytti það engu um ákvörðun refsingar hans nú, þar sem umferðalagabrotin hefðu ekki ítrekunaráhrif.