Svanur Guðmundsson, formaður Félags löggiltra leigumiðlara, segir að rekstrargrundvöllur sjálfstæðra leigumiðlara sé ekki lengur fyrir hendi og hafi í raun ekki verið undanfarin tvö ár, þar sem verkefni þeirra hafi verið hverfandi.
Spurður hvaða áhrif hann teldi það hafa á markaðinn og leiguverð á markaði, að Almenna leigufélagið, sem er í eigu Gamma, hefði keypt 450 íbúðir af Kletti, félagi í eigu Íbúðalánasjóðs og væri nú komið með 1000 íbúðir á leigumarkaði, segir Svanur í umfjöllun um mál þetta í Morgunblaðinu í dag:
„Félagið okkar á eiginlega ekki möguleika á að starfa lengur. Sjálfstætt starfandi leigumiðlarar og leigufélög má segja að séu hætt starfsemi. Fasteignasölurnar hafa tekið yfir að aðstoða fólk á þessu sviði, en þróunin á markaðnum hefur leitt til þess að starfsemi félagsins hefur eiginlega verið lögð á ís.“