Bílaklúbbur Akureyrar og flugfélagið Mýflug ætlar að heiðra minningu látinna félaga klúbbsins og mannanna tveggja sem létust þegar lítil flugvél brotlenti á Hlíðarfjallsvegi rétt fyrir ofan Akureyri á athafnasvæði klúbbsins í byrjun ágúst árið 2013. Tveir steinar, minnisvarðar um þá látnu, verða afhjúpaðir kl. 17 í dag.

Páll Steindór Steindórsson, flugstjóri og Pétur Róbert Tryggvason, slökkviliðs- og sjúkraflutningamaður létu lífið í slysinu.

Eiríkur Björn Björgvinsson, bæjarstjóri Akureyri flytur ávarp ásamt því að tónlist verður leikin á milli dagskrárliða. Boðið verður upp á veitingar og verður spyrnubraut klúbbsins opin frá kl. 19. Geta bílstjórar og hjólreiðamenn spreytt sig í brautinni. Ekki er um formlega keppni að ræða.

„Þetta er annars vegar minnisvarði um látna félaga Bílaklúbbs Akureyrar og hins vegar um þá Palla og Pétur sem fórust í þessu slysi,“ segir Þorkell Ásgeir Jóhannsson, flugstjóri hjá Mýflugi. „Þetta eru veglegir steinar sem við fundum hérna úti í sveit, þeir koma bara eins og steinar eiga að koma, með mosa og skófum, náttúrulegir.“

Minnisvarðarnir verða inni á svæði klúbbsins. Allir eru velkomnir til afhafnarinnar.

Tengdar fréttir

Flugslys á Akureyri

Ekkju dæmdar bætur vegna flugslyss

• Rangar ákvarðanir teknar
• Sett í stöðu sem hún réð ekki við
• Lokaskýrslan væntanleg í næsta mánuði
• Tók lengri tíma en vonast var til

» Fleiri tengdar fréttir

• Blogga um frétt