Giftu sig um borð í varðskipi

„Við ætluðum upphaflega að gifta okkur einhvers staðar fyrir utan safnið, ég sendi póst til athafnastjóra hjá söfnum Reykjavíkur og hún lagði til að við giftum okkur á skipinu sem okkur fannst alveg tilvalið,“ segir Magnús Guðmundsson, sem kvæntist Jennifer Barrett um borð í varðskipinu Óðni á Menningarnótt í Reykjavík sl. laugardag.

Varðskipið er hluti af Sjóminjasafninu í Reykjavík en þar stendur yfir sýningin „Þorskastríðin“ sem fjallar um deilur milli Íslands og Bretlands um fiskveiðiréttindi á Íslandsmiðum á árunum 1958-1976.

Magnús og Jennifer vissu af sýningunni og vildu giftast í nálægð við hana þar sem Jennifer er frá ensku sjávarborginni Hull, en útgerðin frá borginni varð fyrir miklu tjóni eftir þorskastríðin.

Varðskipið Óðinn tók þátt í öllum þorskastríðunum og þótti því kjörin staðsetning fyrir brúðkaupið.

„Við vorum aftast í skipinu, undir þyrlupallinum. Birgir, sem sá um skipið, tók rosalega vel á móti okkur og þetta fór allt saman mjög vel.“

Hafa fyrirgefið þorskastríðin

Í Hull er togari með nafninu Arctic Corsair til sýnis. Togaranum var siglt á skut Óðins í þorskastríðinu eftir að varðskipsmenn reyndu í þrígang að klippa togvíra skipsins. Magnús segir að Jennifer hafi oft farið um borð í togarann, en hann hafi ekki haft tækifæri til þess. „Ég hef komið til Hull og farið á sjóminjasafnið þar, en ekki séð skipið,“ segir hann.

Öll föðurætt Jennifer er frá Hull og voru þónokkrir brúðkaupsgestir þaðan mættir til Reykjavíkur. Að sögn Magnúsar var mikill áhugi á meðal þeirra um skipið. Ensku gestirnir voru þó langflestir búnir að fyrirgefa þorskastríðin. „Amma Jennifer var fullorðin kona á meðan stríðin gengu yfir og hún á það til að segja að þau hafi sett reykinn í Reykjavík en flestum öðrum er orðið sama,“ segir Magnús.

Hittust á netinu

Magnús og Jennifer búa saman í miðbæ Reykjavíkur. Þau kynntust á netinu, en þá var Jennifer þegar flutt til Íslands þar sem hún á nokkra vini.

Að athöfn lokinni var skálað í kampavíni, á miðri Menningarnótt.