Yfirgnæfandi líkur eru á því að ofurmáninn sem verður á himni síðdegis, muni ekki sjást frá Íslandi. Til þess er skýjahulan of þykk. Þetta segir veðurfræðingur á Veðurstofu Íslands. Mögulegt er að glitta muni í mánann á Norður- og Norðausturlandi. Þar verður þó frekar skýjað. „Það verða þó einhver göt. En hvort það er nóg til að það sjáist í tunglið er alls óvíst,“ segir Óli Þór Árnason, veðurfræðingur. „En hér sunnan- og vestalands eru yfirgnæfandi líkur að það sjáist ekki uppúr.“
Í dag er svokallaður „ofurmáni“ á himni en það kallast fullt tungl þegar það er innan við 367.607 kílómetra frá jörðu.
Fullt tungl hefur ekki verið svo nálægt jörðu í 68 ár, eða síðan 26. janúar 1948, og er það nú í um 356.523 kílómetra fjarlægð. Á Stjörnufræðivefnum kemur fram að tunglið sé mislangt frá jörðu vegna þess að það er á sporöskjulaga braut um hana. Eftir 18 ár eða hinn 25. nóvember 2034, verður fullt tungl 75 kílómetrum nær okkur en nú er.
„Um leið og sólin sest í dag byrjar tunglið að rísa í austri. Fólki ætti því að horfa þangað ef veður leyfir,“ sagði Sævar Helgi Bragason, formaður Stjörnuskoðunarfélags Seltjarnarness, í Morgunblaðinu í dag. Samkvæmt upplýsingum á vef Veðurstofu Íslands mun sólin setjast klukkan 16.29 í dag.
„Ég hvet alla til að horfa sem oftast upp til tunglsins. Það er stórmerkilegt og gullfallegt hvort sem að það er nálægasta tungl ársins eða ekki,“ sagði Sævar Helgi ennfremur.