Kjör Trump ekki endalok NATO

Forsetakosningarnar í Bandaríkjunum munu væntanlega ekki hafa mikil áhrif á veru Bandaríkjanna í NATO eða marka enda sambandsins. Aftur á móti gætu orðið nokkrar áherslubreytingar sem snúast helst um aukna þátttöku annarra landa en Bandaríkjanna og frekari fjárframlög í samstarfið. Þetta segir Magnus Nordenman, deildarstjóri Transatlantic Security Initiative hjá Atlantic Council í Washington.

Nordenman var einn fyrirlesara á fundi Varðbergs, NEX­US - rannsóknarvettvangs á sviði öryggis- og varnarmála og Alþjóðamála­stofn­un­ar Há­skóla Íslands í Þjóðminja­safn­inu í dag.

Hann sagði áhersluatriði Trump í tengslum við NATO væntanlega ráðast mikið af því hvaða fólk hann veldi sem ráðherra, en aðrar NATO-þjóðir megi búast við því að óskað verði eftir því að byrðunum af samstarfinu verði dreift meira en gert er í dag.

Þá sagði hann nauðsynlegt að NATO-þjóðir væru duglegri að koma sér á framfæri í Washington, en hann taldi að sérfræðingar í málefnum NATO væru aðeins um 50 talsins í höfuðborg Bandaríkjanna. Því væri þekking í stjórnkerfinu ytra ekkert rosalega mikil þrátt fyrir mikilvægi samstarfsins. Sagði hann samstarfið því krefjast aukinna samskipta og heimsókna.

Nordenman sagði líklegt að meira myndi sjást til Bandaríkjanna í Evrópu á næstunni, en það væri væntanlega í formi tímabundinnar viðveru í stað langtímaveru. Þó mætti gera ráð fyrir að bandarísk yfirvöld myndu í auknum mæli sækjast eftir staðbundinni samvinnu. Nefndi hann t.d. að Noregur og Ísland myndu koma meira að eftirlitsflugi á Norður-Atlantshafi. Slíkt samstarf væri klárlega eitthvað sem Bandaríkin væru áhugasöm um. Benti hann á að svipað fyrirkomulag væri í málefnum Bandaríkjanna við Svartahaf og í Eystrasaltslöndunum.

NATO herskip í Reykjavíkurhöfn fyrr á þessu ári. Árni Sæberg

• 1 blogg um fréttina

Bloggað um fréttina

• Páll Vilhjálmsson: Nató er í tilvistarkreppu sem bitnar á ESB