„Af hverju ekki? Þessi hurð er alltaf opin og því má búast við hverju sem er,“ segir Riad Dubiak, íbúi við Hafnargötu 32 þar sem eldur braust út í nótt, þegar hann er spurður hvort hann telji að kveikt hafi verið í húsinu.
Í sumar brann bíll á bílastæði við húsið og var grunur um íkveikju þá líka en lögregla rannsakar nú hvort eldur hafi verið lagður að þvottavélum á efstu hæð hússins.
Frétt mbl.is: Fjögur börn í brunanum í Reykjanesbæ
Frétt mbl.is: Kona í haldi grunuð um íkveikju
Dubiak þurfti að fara í miklum flýti úr íbúð sinni á fyrstu hæð ásamt konu sinni og þriggja ára dóttur þeirra í nótt þegar eldurinn braust út. Um 30 manns búa í húsinu og er hluti íbúa fjölskyldur úr hópi hælisleitenda sem dvelja í húsinu á vegum Reykjanesbæjar. Hann segir að mikil hræðsla hafi gripið um sig hjá fólki og að börnin hafi verið grátandi.
Betur fór en á horfðist í nótt og tókst að slökkva eldinn fljótt en mikill reykur fór um allt húsið og voru verslunareigendur á jarðhæð að gera ráðstafanir vegna þess þegar mbl.is bar að garði í hádeginu.