Mjög hlýtt hefur verið í veðri í dag og mældist 11 stiga hiti á Seyðisfirði og hitinn fór í tæp 8 stig á Vatnsskarði eystra, samkvæmt mælingum Veðurstofu Íslands. Heldur kólnar í veðri á morgun en mjög hvasst er á miðhálendinu.
Veðurspáin fyrir næsta sólarhring:
Suðvestan 8-13 en 13-20 um mitt Norðurland. Skúrir eða él en þurrt að mestu norðaustanlands. Vestan 10-15 norðaustanlands í fyrramálið en annars 3-10. Hægari eftir hádegi. Stöku él. Suðaustan 8-15 og dálítil rigning eða slydda seint annað kvöld um vestanvert landið. Kólnar í veðri, frostlaust vestanlands og með sjónum á morgun en vægt frost inn til landsins.
Á mánudag:
Sunnan 8-15 og talsverð rigning, einkum sunnanlands en úrkomulítið norðaustan til. Hiti víða 4 til 8 stig.
Á þriðjudag:
Suðlæg átt, 5-10 m/s og skúrir eða él og hiti 1 til 5 stig en úrkomulaust NA-og A-lands og vægt frost inn til landsins.
Á miðvikudag:
Suðlæg átt, 5-10 og slydda eða snjókoma á köflum um landið sunnanvert en þurrt fyrir norðan. Allhvöss norðaustanátt og snjókoma á Vestfjörðum. Frostlaust við sjóinn en annars vægt frost.
Á fimmtudag:
Norðaustlæg átt, 8-15 og él norðan til, en austlæg eða breytileg átt syðra og lengst af þurrt. Frost 0 til 10 stig, kaldast inn til landsins.
Á föstudag:
Útlit fyrir norðlæga átt með ofankomu um landið norðanvert, en úrkomulítið sunnan til. Frost um allt land.
Á laugardag:
Norðanátt á landinu, él á annesjum norðanlands en bjartviðri sunnanlands. Frost um allt land og víða talsvert frost.