Íbúðarbyggð á innri leið Sundabrautar

Dagur B. Eggertsson borgarstjóri og forráðamenn fasteignafélagsins Festis ehf. undirrituðu síðastliðinn föstudag samning um uppbyggingu 332 íbúða í fimm húsum á Gelgjutanga.

Með þessum samningi er endanlega ljóst að ekki verður ráðist í gerð Sundabrautar samkvæmt svonefndri innri leið. Samkvæmt þeirri leið, þ.e. leið III, átti Sundabrautin að taka land á Gelgjutanga og liggja að mislægum gatnamótum á Sæbraut.

Sundabraut hefur verið til umræðu í fjóra áratugi. Hún var komin á góðan rekspöl árið 2008, rétt fyrir bankahrunið. Upphaflega voru hugmyndir um fjórar leiðir en þeim hafði verið fækkað í tvær. Í aðalskipulagi Reykjavíkur 2010 til 2030 hafði þeim verið fækkað í eina, þ.e. leið I. Sú leið mun liggja frá Kleppi neðansjávar í göngum yfir í Gufunes, að því er fram kemur í umfjöllun um mál þetta í Morgunblaðinu í dag.