Ríkið svíkur loforð um framhaldsskólana

„Stjórn Félags framhaldsskólakennara gagnrýnir stjórnvöld harðlega fyrir að efna ekki þau loforð sem yfirvöld menntamála gáfu þegar námstími til stúdentsprófs var styttur,“ þetta kemur fram í fréttatilkynningu Kennarasambands Íslands sem er ósátt við að framlög til framhaldsskólanna séu skorin verulega niður í ríkisfjármálaáætlun fyrir árin 2017-2022.

„Loforð um að allur fjárhagslegur ávinningur af styttingunni yrði ekki tekinn út úr rekstri framhaldsskólanna heldur nýttur til þess að auka þjónustu við nemendur hafa nú verið svikin,“ segir í tilkynningunni.

Ekki sé heldur að sjá í ríkisfjármálaáætluninni að til standi að efna þau fyrirheit stjórnvalda að jafna laun opinberra starfsmanna við sambærilega hópa á almennum markaði.

„Stjórn Félags framhaldsskólakennara skorar á Alþingi að standa vörð um íslenskt menntakerfi og spyrna við fótum gegn áframhaldandi fjársveltum framhaldsskólum.“

• 1 blogg um fréttina

Bloggað um fréttina

• Jón Ingi Cæsarsson: Svikaslóð ríkisstjórnarflokkanna.