Snæbjörn Steingrímsson, fyrrverandi framkvæmdastjóri SMÁÍS, var í dag dæmdur í 16 mánaða fangelsi, þar af 13 mánuði skilorðsbundna, fyrir að hafa dregið sér fé af reikningum samtakanna, látið leggjast undir höfuð að færa lögbundið bókhald þess og ekki staðið skil á virðisaukaskattskýrslum.
Þá var Snæbjörn dæmdur til að greiða 17,3 milljónir til ríkissjóðs, ella sæta 240 daga fangelsi.
Í ákæru málsins var Snæbjörn sakaður um að hafa á árunum 2008 til 2014 dregið sér tæplega 640 þúsund af debetreikningi félagsins, greitt með kreditkorti félagsins til eigin nota fyrir 6,8 milljónir og látið undir höfuð leggjast að færa lögboðið bókhald félagins árin 2008 til 2014. Samtals nema því fjárdráttarbrotin og umboðssvikin samtals um 7,4 milljónum á tímabilinu.
Snæbjörn játaði hluta brotanna fyrir dómi, en um var að ræða vanskil á virðisaukaskattskýrslum.
Hann neitaði hins vegar sök um að hafa á árunum 2008 til 2014 dregið sér tæplega 640 þúsund af debetreikningi félagsins og 6,8 milljónir af kreditkorti þess.
Á meðal þeirra útgjaldaliða sem nefndir eru í ákærunni er fjöldi reikninga á veitingahúsum, krám, vínbúðum og raftækjabúðum. Stærstu stöku færslurnar eru í gegnum Paypal og vegna greiðslna hjá bílasölu.
Þá eru einnig nokkrar úttektir úr hraðbönkum. Færslurnar eiga sér bæði stað hér á landi sem og erlendis. Ákært er fyrir 17 færslur á debetreikningi félagsins og 275 færslur á kreditkorti þess.