Nemendur í þriðja og fjórða bekk í frístundaheimilunum Frostheimum, Draumalandi, Eldflauginni og Halastjörnunni tóku þátt í torfæru-kassabílarallýi sem var haldið á Klambratúni á föstudag.
Keppt var í kynjaskiptum liðum um fyrsta og annað sætið, auk þess sem frístundaheimilin kepptu um hvert væri besta stuðningsliðið og um flottasta kassabílinn, að því er kemur fram í tilkynningu.
Í lokin kepptu starfsmenn í kynjablönduðum liðum um hvaða frístundaheimili er með snörustu starfsmennina í vinnu.
Eftir það steig Aron Hannes á svið og söng fyrir krakkana.
Kassabílarallýið er lokahnykkurinn á starfi frístundaheimilanna yfir veturinn og lögðu krakkarnir hart að sér við æfingar og undirbúning fyrir viðburðinn. Gleðin var þó ávallt í fyrirrúmi í verkefninu.
Frístundaheimilin þjónusta börn í Melaskóla, Grandaskóla, Vesturbæjarskóla, Hlíðaskóla og Háteigsskóla.