María Rut verkefnastjóri Tónlistarborgarinnar Reykjavíkur

María Rut Reynisdóttir hefur verið ráðin verkefnastjóri Tónlistarborgarinnar Reykjavíkur úr hópi 35 umsækjenda. Hlutverk Maríu Rutar verður meðal annars að móta og ýta úr vör aðgerðum í samræmi við tillögur starfshóps um Tónlistarborgina Reykjavík og skapa hagstæð skilyrði fyrir tónlistarstarfsemi í borginni. Þetta kemur fram í tilkynningu frá Reykjavíkurborg. 

María Rut hefur undanfarin ár verið umboðsmaður tónlistarfólks, þar á meðal Ásgeirs Trausta, og sinnt umfangsmiklum verkefnum í því starfi á Íslandi og erlendis. Hún var einnig framkvæmdastjóri Íslensku tónlistarverðlaunanna í nokkur ár og tók þátt í því að byggja upp frumkvöðlafyrirtækið og tónlistarveituna Gogyoko.com.

María hefur verið dagskrárstjóri tónlistarhátíðarinnar Iceland Airwaves, ráðstefnustjóri You Are In Control,  skipulagt Ljósanætur í Reykjanesbæ og kennt verkefnastjórnun hjá Listaháskóla Íslands. Í gegnum árin hefur hún auk þess skipulagt og stýrt ýmsum öðrum verkefnum og viðburðum.

María Rut lærði skapandi verkefna- og viðskiptastjórnun í  Kaos Pilot-skólanum í Árósum og er auk þess með BA-gráðu í stjórnmálafræði frá Háskóla Íslands. Hún hefur einnig lokið netnámskeiði Berklee-tónlistarskólans í markaðssetningu tónlistar á netinu.

Tónlistarborgin Reykjavík er nýtt þróunarverkefni á vegum Reykjavíkurborgar. Verkefnið heyrir undir menningar- og ferðamálasvið Reykjavíkur en starfsstöðin verður við Hlemm, í sama húsnæði og Útón, útflutningsskrifstofa Íslenskrar tónlistar.

• Blogga um frétt