Eldur kom upp á eyðibýlinu Ásláksstöðum í Vogum á Vatnsleysuströnd nú síðdegis. Tveir bílar frá Brunavörnum Suðurnesja voru sendir á staðinn ásamt tíu slökkviliðsmönnum og var húsið alelda þegar slökkvilið koma á staðinn.
Samkvæmt upplýsingum frá slökkviliðinu þá gengur vel að slökkva eldinn og hindra frekari útbreiðslu hans.
Ekki hafði verið búið í húsinu, sem var timburhús um langt skeið, en það telst alónýtt eftir brunann.
Lögreglan á Suðurnesjum mun sjá um rannsókn á upptökum eldsins, en að sögn slökkviliðsins var ekkert rafmagn á húsinu sem veki upp spurningar um hvort um íkveikju hafi verið að ræða.