Heildsölum skylt að útvega nauðsynleg lyf

Nýtt frumvarp er væntanlegt um heildarendurskoðun á lyfjalögum. Þar verður sérstaklega fjallað um skýran áskilnað gagnvart heildsölum um að skila lífsnauðsynlegum lyfjum inn á markað. Þetta er meðal þess sem kom fram í máli Svandísar Svavarsdóttur í óundirbúnum fyrirspurnatíma á Alþingi í dag.

Frétt af mbl.is

Skjaldkirtilslyf komið aftur í sölu

Guðmundur Andri Thorsson, þingmaður Samfylkingarinnar, beindi spurnum sínum til heilbrigðisráðherra og vildi vita hvort þess væri að vænta að tekið yrði á þeim skorti á lífsnauðsynlegum lyfjum sem reglulega kemur upp hér á landi. „Er hugsanlega hægt að herða kröfur sem gerðar eru til lyfjainnflytjenda og lyfsala almennt?“ var meðal spurninga sem Guðmundur Andri velti upp.

Guðmundur Andri beindi spurnum sínum til heilbrigðisráðherra. mbl.is/Kristinn Magnússon

Svandís sagðist sjálf hafa verið hissa á algengi vandamálsins á Íslandi. Hún sagði nýtt frumvarp um heildarendurskoðun á lyfjalögum væntanlegt, og að þar væri sérstaklega tekið á atriðum í þeim anda sem Guðmundur Andri nefndi. „Það er að segja að það sé skýrari áskilnaður gagnvart heildsalanum um það að skila þessum lyfjum inn á markaðinn.“

„Ég hef óskað eftir því við skrifstofu gæða og forvarna að þetta mál verði sérstaklega tekið fyrir á næsta samráðsfundi með lyfjastofnun. Þar verður farið yfir það hvað er til ráða.“

• 1 blogg um fréttina

Bloggað um fréttina

• Erla Magna Alexandersdóttir: SKELFILEG HENTISTEFNA HEILDSALA OG ENGIN LÖG UM HVORT ÞEIR PANTA …